ROXAS CITY – Yara na sa isa ka punerarya sa Barangay Pob. Ilawod banwa sang Dumarao ang bangkay sang isa ka babaye nga nasapwan patay sa atubang mismo sang Capiz State University ukon CAPSU Dumarao Campus sa Barangay San Juan sang amo nga banwa
Ginkilala ang biktima nga si Rose Bering Matutino 28-anyos kag indi pa matumod kun sa diin ini nagapuyo bangud base sa iya tatlo ka mga ID tatlo ka mga lugar sini ang iya ginagamit nga ginalakipan sang Anilao, Iloilo; Cudian Ivisan, Capiz kag Jamul-awon, Panay, Capiz.
Sa interview sang Bombo Radyo sa isa ka security guard nga on-duty sa CAPSU Dumarao Campus nga nakabati ini sang asud-asud nga lupok sang armas luthang sa guwa sang unibersidad takna ala’ 1:45 tubtob alas 2 sang kaaganhon.
Suno pa diri nga nakabati ini sang hinali nga pag-andar sang salakyan nga pick-up kun sa diin ginapahayag nga padulong sa diresksyon sa siyudad sang Iloilo.
Apang, wala ini nakaguwa bangud man madulom ang palibot kag para man sa iya nga seguridad.
Suno naman kay Police Captain Larnel Frial sang Dumarao PNP nga nakabaton na lamang sila sang impormasyon nga may yara sang nasapwan nga babaye sa nasambit nga lugar.
Ginpahayag ni Frial nga may yara na lamang sang igo sang bala sa nawong, liog kag likod ang biktima tuga sang pagpangluthang.
Narekober naman ang tatlo ka mga basiyo sang Cal .45 nga armas luthang sa nasambitan nga lugar.
Padayon naman ang imbestigasyon sang mga kapulisan sa nagluntad nga krimen.
Ginahibalo pa kun may yara ini sang koneksyon sa nasapwan patay nga lalaki sa banwa sang Dumalag.
