ROXAS CITY CAPIZ – Ginaalegar nga nabiktima online-scam ang isa ka babaye sa syudad sang Roxas City, Capiz.
Ginkilala ang ginapahayag biktima kay alyas “Mary Ann”, 25- anyos, kag residente sang Inzo Arnaldo Village, San Jose, Burgos Street, sining syudad samtang ang ginatudlo scammer ang ginkilala kay alyas “Ma’am Glenda”.
Sandig sa impormasyon nga nagikan sa Roxas City PNP, ginpahayag sini nga personal nga nagpadulong sa ila nga talatapan ang biktima agud ipabalhag ang ginapahayag pagpang scam sa iya sang isa ka babaye pinaagi sa online transactions.
Ginapahayag nga nakipagtransaction ang biktima sa isa ka facebook assistor nga may pangalan nga “Ma’am Glenda” kung sa diin ipa-proseso nya kuntani ang pagpakay-o sang spelling sang iya pangalan sa PSA certificate kag ginhatagan sya sang presyo nga P5,700.00 kabaylo sang pagproseso sang nasambit nga dokumento.
Dugang pa diri nga ginsalig na niya sa assistor ang mga requirements kag naghatag sang pauna nga bayad kag nakasugtanan nila nga magafully paid siya pagmatapos na ang dokumento kadungan man sang pagbayad nya sang shipping fee.
Apang, sang nagdesisyon ang biktima nga indi na pagpadayunon ang transaction kag iparefund nalang kuntani ang iya ginbayad didto hinali niya lamang nga natukiban nga gin-block na sya sang suspek.
