ROXAS CITY – Nag-angkon sang mga lagob kag nagpalanakit ang lawas sang isa ka empleyado sa isa ka dako nga mall sa Pueblo de Panay, Barangay Lawaan, Roxas City matapos ginaalegar nga ginsakit sang iya man kaupod sa trabaho.
Ang biktima amo si Julie Balcoba, 25 anyos sang Barangay Cabugao, sining siyudad.
Suno diri nga samtang nagapungko siya sa guwa sang mall kag nagahulat sang iya duty, nakibot ini sang ginpalapitan siya ni Jane Besa, 24 anyos.
Ginpahayag ni Balcoba nga hinali na lamang siya ginsabunot ni Besa, gin-ayad sang tampa kag ginmulay.
Suno diri nga ginapangimunan siya ni Besa bangud naga-chat sa iya ang kahagugma sini.
Apang panindugan ni Balcoba nga wala siya sang malain nga intensiyon sa kahagugma ni Besa bangud may yara man siya sang kaugalingon nga kahagugma.
