Arestado ang isa ka 41-anyos nga babaye nga nagpakilala nga taga-media matapos ginapahayag nga nagpamahog sa pila ka mga empleyado sang lokal nga gobyerno sang Rodriguez, Rizal.
Suno kay Police Captain Fernan Romulo, Deputy Chief of Police sang Rodriguez Police, nagbisita ang suspek sa munisipyo kag naghingyo sang mga accomplishment sang lokal nga gobyerno para iwaragwag sang ila nga news organization. Sang wala ini ginpasugtan, ginaalegar nagpamugos pa ang babaye nga makigkita sa mayor kag sukton sang bayad sa iya nga biyahe.
Sang wala matuman ang iya nga ginahingyo, nagpamahog ini sang negatibo nga publicity batuk sa munisipyo sang Montalban.
Bangud sini, gilayon ini nga ginreport sa mga kapulisan kag nadakpan sa Quezon City. Ginpanginwala sang suspek ang alegasyon nga nagpamahog kag nagpangayo sang pasaylo sa mga empleyado, kag gin-athag nga katuyuan lamang niya nga mag-courtesy call kag ipasa ang ila nga proposal.
Sa subong, nakahunong ang babaye sa custodial facility sang Rodriguez Municipal Police Station kag nagapangatubang sa kaso nga grave coercion.
Padayon pa nga ginakuhaan sang pahayag ang pamunuan sang munisipyo sang Rodriguez.
