Ginkilala ang kapisan kag dedikasyon ni Regine B. Denonong, isa ka laborer sang National food Authority Capiz bilang kabahin sang pagselebrar subong nga Women’s Month.
Ini nagapamatuod nga ang ikasarang sang isa ka lalake ang mahimo man sang isa ka babaye.
Sa interview sang Bombo Radyo kay Regine, iya ginpahayag nga halin pa sang tuig 2020 nagatrabaho na siya sa NFA kag mahimo niya nga magsakwat sang sinako nga palay kag bugas nga may kabug-aton sang 50 ka kilo.
Dugang pa niya nga sa pihak sang kabudlay sang iya trabaho, padayon siya nga nagapakita sang kusog kag determinasyon agud makabulig sa iya pamilya.
Bangud sa iya kapisan kag dedikasyon, madamo sang napukaw nga mga kababainhan nga nahuya ukon nahadlok magpakita sang ila nga ikasarang sang pangpangabuhi sa adlaw-adlaw.
Ang istorya ni Regine isa ka inspirasyon sa madamo nga kababainhan, nga nagapakita nga ang pagkababaye indi limitasyon kundi isa ka simbolo sang kusog, pagpaninguha kag resiliency agud nga maipakita sa tanan nga ang mga babaye sarang nga mahimo ang ulubrahon sang isa ka lalake.
Probinsya sang Capiz, nakabaton sang 8 ka mga awards sa Pagdáyaw 2025: Western Visayas Tourism Awards
