Babaye sa France, ginmultahan sang masobra P80K bangud sa iya kuring nga lagawan

Isa ka 70-anyos nga babaye sa Hérault, France ang ginpabayad sang 1,250 euro ukon kabaylo sang masobra P83,000 matapos ginreklamo sang iya tupadbalay ang masami nga pagtabok sang iya kuring sa ila nga ugsaran.

Ginpahayag sang tagreklamo nga ang kuring nga si Rémi, nga hinuptanan ni Dominique, nagabilin sang mga marka sang tiil sa dingding, ihi sa habol, kag higko sa hardin.

Sang Enero, nagdesisyon ang korte, sa diin nga ginpaboran ang tagreklamo kag ginpabayad si Dominique sang multa. Apang indi pa tapos ang kaso, kay ginapatawag ini liwat sa korte subong nga Disyembre matapos liwat nga nagtabok si Rémi sa kudal sang tupadbalay.

Posible naman nga maglaboot sa 2,000 euro ukon masobra P133,000 ang bag-o nga multa nga ipamatbat kay Dominique.