ROXAS CITY – Ginkaakig sang isa ka babayi kag gintunaan sang iya pagwaras matapos nga gin-akat sini ang iya kahagugma nga magpadulong sa Hotel apang wala magpasugot.
Bangud sini, ginrespondehan sang mga kapulisan si alyas “Jean” bangud sa pagtuga sang kinagamo sa Taft Street, Barangay III, Roxas City, kahapon nga adlaw, Oktubre 23.
Suno sa kahagugma sang babayi nga si alyas “James” mga takna alas-4:00 sang hapon sang gin-akat ini sang iya kahagugma nga magpadulong sa Hotel, apang nagsabat ini nga P100 palang ang iya kita’ sa pagpangtahi sang sapatos.
Natulogan si “Jean,” apang mga alas-5:00 sa amu man nga hapon, nakabugtaw ini kag nagpadulong sa puwesto sang iya nobyo, liwat ini nga nagpang-akat apang liwat nga nagpamalibad si “James” bangud kulang sa gihapon ang iya kuwarta.
Nagtan-ay si “Jean” nga siya ang magabayad sang lodging fee, apang sang gintsekyar ni “James” P100 man ang kuwarta sini.
Ginkaakig sang babayi ang pagpamalibad sang lalaki, gani ginwas-ag sini ang mga sapatos nga display sa puwesto sang iya kahagugma.
Gintinguhaan ni “James” nga pauntaton ang iya kahagugma apang gintuyo ini nga bun-on gamit ang cutter.
Bangud diri, nagresponde ang mga kapulisan kag ginkustodiya ini sa Roxas City Police Station.
Natukiban nga yara sa impluwensiya sang makahulubog nga ilimnon si “Jean”.
Nahibaluan nga posible ginkaselos sang babayi ang pagkitaay sang iya kahagugma kag ni alyas “Rose” ang ex-girlfriend ni “James”.
