ROXAS CITY – Ginpadangat sa pribado nga ospital ang isa ka babayi matapos nahulog sa ginasakyan nga traysikol sa Barangay Tiza, sining syudad.
Ginkilala ang biktima kay Mariepress Cervales, residente sang Brgy. Lanot, Roxas City.
Sa nakuha nga impormasyon sang Bombo Radyo sa kaupod kag ka-trabaho sang biktima, nagasakay si Cervales sa may nalikod nga bahin sang tricycle driver apang pag-abot sa kurbadahon kag ginluntaran sang insidente, nakibot na lamang ang mga ini sa pagsinggitan sang pila ka mga residente bangud sa pagkahulog ni Cervales.
Gilayon naman nagpundo ang ginsakyan nga traysikol apang madasig ini nagpalagyo.
Ginaalegar natapakan pa ang biktima sang nagasunod nga salakyan.
Sa pagtsekyar sang iya mga kaupdanan, nag-angkon si Cervales sang gaob sa nawong, nagadugo ang baba kag ilong kag wala na ini sang alinto.
Handa naman ang tag-iya sang salakyan nga nagasunod sa traysikol mag-kooperar sa mangin imbestigasyon sang kapulisan.
Sa karon, nagapadayon pa ang imbestigasyon sang mapulisan angut sa natabo nga insidente.
