ROXAS CITY – Anay nagaserbe nga Medic Political Guide sang 1st Platoon Bataan-Zambales Provincial Party Committee Central Luzon, isa ka Regional Committee sang CPP/NPA ang naaresto nga si Carina Abuyan Oliveros alias “Carina Judilyn Oliveros/Meryln/Ida/Tintin” sa Barangay Lantangan, Pontevedra Capiz sa gintingub nga pwersa sang Pontevedra MPS, PIU Capiz PPO, RID6, RMFBI-105th MC, 1st Capiz PMFC, Capiz Maritime Police Station, CIDG Capiz PFU, Capiz PPO CTG Trackers Team kag RID-PRO3.
Ini ang ginkumpirmar ni PMaj. Syril Punzalan, hepe sang Pontevedra MPS sang mapakig-angutan sang Bombo Radyo.
Suno diri, sang Disyembre 3, 2013 pa ginpapanaog ang warrant of arrest batuk kay Oliveros sa kaso nga Murder nga gin-isyu kag ginpirmahan ni Hon. Jose S. Vallo, Presiding Judge sang RTC, Third Judicial Region, Branch 68, sa Camiling, Tarlac.
Dugang sini, ang kaso nga murder and nakomiter sang ini ang nagaupod pa sa rebelde nga grupo sa Zambales.
Wala naman sang pyansa nga ginrekomendar ang korte para sa nasambit nga kaso.
Mahibaluan, tumandok sang probinsya sang Zambales ang arestado apang nakapamana sang taga-barangay Lantangan kag nagtinir sang masobra napulo na katuig sa lugar.
Aminado man ang bana sini nga anay katapo sang rebelde nga grupo ang iya asawa kag desidedo naman kuntani nga magbag-o.
