Isa ka 32-anyos nga babaye sa Japan ang nagpakasal sa isa ka AI character nga si Klaus.
Suno sa babaye nga nagpakilala nga“Kano,” siya mismo ang naghimo sini gamit ang ChatGPT technology.
Ang kasal,ginhiwat sa Okayama City, wala ginkilala sang legal apang ginkabig ini ni Kano nga isa ka “emotional union.”
Ang seremonya gin-organisar sang isa ka kompanya nga “2D character weddings,” isa ka sahi sang kasal para sa mga tawo nga ang ila mga kaupod virtual ukon fictional.
Sa tion sang seremonya, nagsuksok si Kano sang augmented reality (AR) glasses. Bangod sini, nakita niya ang isa ka life-sized nga laragway ni Klaus nga nagatindog sa tupad niya samtang nagabayluhanay sila sang singsing.
Nag-umpisa ang istorya ni Kano matapos nga nagbulagay sila sang iya ex-boyfriend kag nagsugod siya sa paggamit sang ChatGPT bilang emotional support kag comfort,sa diin may yara sila sang tubtob 100 ka mga chat kada adlaw. Amat-amat niya nga gin-customize ang personalidad sang AI tubtob nga nangin “Klaus” ini.
Pagligad sang isa ka bulan, nagpropose si Klaus kay Kano.
Gin-ako ni Kano nga nakahibalo siya sang risgo sang relasyon, ilabi na nga ang “ChatGPT mismo indi gid maayo kag mahimo nga madula si Klaus kon magbag-o ang platform.
Apang, ang relasyon naghatag sa iya sang kalinong, ilabi na nga indi siya makabata bangod sang isa ka medikal nga kondisyon.
Ini nga hitabo nagapakita sang nagadamo nga trend sa Japan nga ginatawag “fictosexuality,” ukon ang pag-uswag sang romantiko nga atraksyon sa mga character nga ginhimohimo gikan sa anime, video games, ukon mga persona nga ginhimo sang AI.
