Ginpamatbatan sang korte sang Taiwan ang isa ka babaye sang tatlo ka bulan nga pagkapreso matapos nga nagtuga ini sang kinagamo sa ila komunidad pinaagi sa paggamit sang megaphone sa pagpakamalaut kag pag-insulto sa iya mga kasilingan sa tunga sang kagab-ihon.
Ang akusado nga ginkilala lamang sa iya apelyido nga Chen, nagbutang sang mga sound-amplifying equipment sa iya balkonahe kag gingamit ini sa pag-”broadcast” sang mga insulto sa maximum volume, suno sa mga reklamo gikan sa mga pumuluyo.
Ang pag-antos sang mga kasilingan sini ang nagsugod sang Mayo 2023 kag naglawig sang halos duha ka tuig.
Ginalegar nga ginahimo ini ni Chen sang indi magnubo sa tatlo ka beses kada semana, nga nagalawig sing pila ka minuto kada sesyon.
Sa depensa ni Chen, gin-ako sini nga nagagamit siya sang megaphone apang nagpanindugan nga nagbalos lang siya bangud nagatublag sa iya pagtulog ang gahod sang iya mga kasilingan.
Apang, ginsikway sang hukom ang iya argumento kag nagdesisyon nga ang iya ginhimo ang “beyond reasonable” bangud indi na ini maagwanta sang iya mga kasilingan.
Ang pamatbat amo ang tatlo ka bulan nga pagkapreso mahimo man nga islan sang multa nga P150,000, apang mahimo sa gihapon nga mag-apelar ang akusado.
