Nakibot ang mga tawo sa Buddhist temple sa Nonthaburi sang natukiban nila nga buhi pa ang 65-anyos nga babaye sa sulod sang lungon kag natalana na kuntani nga i-cremate.
Suno kay Pairat Soodthoop, manager sang Wat Rat Prakhong Tham temple, nakabati sila sang mahinay nga pagpanuktok gikan sa lungon samtang nagapakig-istorya sa utod sang babayi.
Sang ila ini ginbuksan, nakita nila nga ang tigulang nagahulag ka nagamuklat ang iya mga mata.
Nagaguwa nga ang kakulang sang death certificate amo ang nagluwas sa iya. Una siya nga gindala sang iya utod sa Bangkok halin sa Phitsanulok agod idonar ang iya mga organs, apang nagpamalibad ang ospital bangod wala sang opisyal nga death certificate.
Bangod sini, gindala siya sa templo agod i-cremate, apang ginpangabay sila sang amo man nga dokumento antes sang seremonya.
Samtang nagapaathag nahanungod sa mga papeles, may nabatian nga panuktok gikan sa sulod sang lungon.
Suno sa utod, abi niya nagtaliwan na ini matapos nga wala na nagahulag kag daw kaangay nga nag-untat na ini sa pagginhawa sa sulod sang duha ka adlaw.
Gilayon man nga gindala sa ospital ang iya utod agud nga i-check ang iya sini nga lawas.
Nagpromisa naman ang templo nga pagasabton nila ang tanan nga mga galastuhan sa medisina.
