Isa ka hinuptanan nga baboy sa Illinois opisyal nga ginkilala sang Guinness World Records pagkatapos nga nagpakita ini sang tumalagsahon nga ikasarang sa skateboarding.
Ang baboy amo si Norbert gikan sa Buffalo Grove ang nagbutang sang record para sa pinakamadasig nga oras nga nakalab-ot sa 10 meters samtang nagaduso sang skateboard, natapos niya ang distansya sa sulod sang 11.32 segundos.
Suno sa caregiver ni Norbert nga si Vincent Baran, aksidente sini nga natukiban ang iya talento sang nakita sini ang iya daan nga skateboard. Ginkuha niya ang board kag gintistingan si Norbert, kag sa sulod sang 15 minutos, ang baboy nagabalanse sa skateboard gamit ang unsalted peanuts bilang padya.
Pagkatapos sang pila ka sesyon sang paghanas, natun-an ni Norbert nga iduso ang iya kaugalingon samtang yara sa skateboard sa dalan. Sa subong, ang 175-pound nga baboy daw kaangay nga natural na sa board kag nanamian magpakita sang iya mga ikasarang.
