ROXAS CITY – Kumpyansa ang chairman sang Committee on Ethics sa Sangguniang Panlungsod nga daku ang tsansa sang Barangay Milibili, nga makuha ang back to back championship sa Lupong Tagapamayapa Incentives award sang Department of Interior and Local Government (DILG) – national level.
Ginpahayag ni City Councilor Midelo Ocampo nga posible makuha sang barangay nga anay ginapangalagran ang kampeonato sa karon nga kahiwatan bangud sa madamo nga inobasyon nga nadugang sa ila justice system kag pila ka mga good practices nga ginapatuman sa ila barangay.
Ginkumpirma man sang opisyal nga na-imporma na siya ni DILG provincial director John Ace Azarcon kag posible mabaton sa masunod nga mga inadlaw sang pamunuan sang Barangay Milibli ang imbitasyon angut sa awarding ceremony sang Lupong Tagapamayapa Incentives award sa Oktubre 18, 2019 sa Metro Manila.
Pananglitan nga mangin kampeon ang Barangay Milibili sa amo nga kahiwatan, daku ini nga bugal para kay Ocampo bangud antes nagpungko bilang konsehal sang syudad siya pa ang nag-atubang kag nagpresentar sa mga national evaluators sang mga dokumento matapos nga nalakip sa Top 3 ang Barangay Milibli sa Lupong Tagapamayapa Incentives award-national level.
Ginakabig ni Ocampo nga isa ka matahum nga legasiya ang iya ginbilin sa ila barangay bilang anay barangay kapitan sang Barangay Milibili.
Makabulig man sang daku ang mabaton nga cash prize agud magamit ini sa pila ka mga proyekto sa barangay.
