ROXAS CITY – Natalana nga pasakaan sang panumbungon ang suspek nga backhoe operator matapos nga ginbuno ang biktima nga foreman sa Sitio Katamnan, Barangay Parian,Sigma Capiz.
Nagapabilin sa karsel ang suspek nga si Vicente Estita 48-anyos, backhoe operator kag residente sang Igbaras, Iloilo matapos nga ginbuno ang biktima nga si Rosalino Taboco 40-anyos, foreman kag residente sang Barangay Bunga, Don Salvador Negros Occidental.
Matandaan nga sandig sa inisyal nga imbestigasyon sang Sigma Municipal Police Station, nga samtang nagakatulog sa ila nga bunkhouse ang suspek hinali nga nag-abot ang biktima kag ginpukaw ang nasambit nga suspek.
Ginaalegar nga may nagluntad nga pagbinaisay sa tunga sang suspek kag biktima kun sa diin hinali nga ginbuno ni Estita si Taboco sang makapila ka beses sa tiyan.
Nag-angkon naman sang duha ka pilas sa tiyan ang biktima kag isa sa kilid sang lawas sini.
Sa karon padayon nga ginabulong sa isa ka pribado nga ospital si Taboco.
