Maumpisa na sa Hunyo 5 sa Bacolod City, Negros Occidental ang local rollout sang “Benteng Bigas Meron Na” (BBM Na) program sang gobyerno nga may katuyuan nga sarang mabakal ang bugas sa mas barato nga presyo para sa mga pamilya nga Pilipino.
Sa interview sang Bombo Radyo kay Jasmin Lintag, General Manager sang National Food Authority Western Visayas, nakig-angut ang Bacolod City Local Government Unit sa Food Terminal Incorporated (FTI) agud mahatagan sang P20/kilo nga bugas para mangin available sa vulnerable sector ukon ang mga Senior Citizens, pregnant women kag Person With Disabilities (PWDs).
Suno kay Lintag nga mahimo man maka-avail ang iban nga probinsya kun ang LGU magsulod sa Memorandum of Agreement sa FTI kun sa diin magabakal ang LGU sa FTI sang bugas sa balor nga P33 per kilo kag pagatungaon sang National Government kag Local Government Unit ang subsidy nga P13.
Nahibaluan nga antes sini, una na nga nalunsyar ang nasamnit nga program sa Cebu City magluwas sa Luzon.
Pahayag pa sang natungdan nga kun may mga luyag mag-join nga LGU sa programa sang Presidente, i-tap nila ini sa malapit nga warehouse sang NFA nga amo ang maga-withdraw sang NFA rice.
Sa pihak nga bahin, magasugod naman sa Hunyo 13 ang programa sa tunga sang Department of Agriculture kag Department of Labor and Employment nga P20 per kilo rice program para naman sa mga low wage earners.
Ginpasiguro man sini nga maayo ang quality sang bugas nga newly milled kag naga-edad between zero to three months.
