ROXAS CITY – Isa ka bag-o bun-ag nga lapsag ang ginbilin sa guwa sang isa ka balay sa Vizcaya Ville sa Barangay Vizcaya, President Roxas.
Sa interview sang Bombo Radyo kay alyas Jane, ginpahayag sini nga nakatig-ang lamang ini sang buksan ang pirtahan sang ila balay.
Ginkakibot sini sang makita ang isa ka tualya nga may nagalabaw nga tiil sang lapsag.
Ginbuksan sang ginang ang tualya kag nakita sini ang bag-o bun-ag nga lapsag nga wala pa nautod ang pusod.
Nagpangayo sang responde ang ginang sa Municipal Disaster Risk Reduction and Management Office sang President Roxas nga gilayon nagpadulong sa ila balay kag nagdala sang lapsag sa ospital.
Suno kay alyas Jane nga wala ini sang ideya kun sin-o ang iloy nga nag-abandonar sang anak sa guwa sang balay sang iban nga tawo.
Nahibaluan nga nakabati sang hibi sang bata kagab-i si alyas Jane, apang nagdumdum ini nga gikan ini sa ila tupad balay nga may yara man sang lapsag.
