JAMINDAN, CAPIZ- Malipayon nga nagpasalamat kag nagpakigbahin sang mensahe ang bag-o nga alkade sang Jamindan matapos ini nga opisyal nga nagpungko sa pwesto.
Sa interview sang Bombo Radyo kay Mayor Donnah Valdemar sang Jamindan, Capiz, iya ginpahayag ang iya sini nga mga handom para sa pumuluyo kag ang pagpasalamat sa mga nagbulig kag naghatag sang suporta sa iya kandidatura.
Dugang pa sini nga kabahin sa iya mga handom ang pagpasanyog sang edukasyon para sa mga kabataan sa banwa. Sa iya liderato, nagalaum siya nga mas mapasanyog pa ang kalidad sang edukasyon kag ang mga oportunidad para sa masunod nga henerasyon.
Nahibaluan nga luyag man sini nga ipadayon ang mga legasiya nga ginbilin sang nagligad nga administrasyon, kun sa diin ginpahamtang ang mga programa nga nagaadbokar sa ikaayong lawas sang mga Jamindanganon. Ginatutukan ni Valdemar ang importansya sangikaayong-lawas, edukasyon, imprastruktura, kag mga proyekto nga magapadayon sa pagpauswag sang banwa.
Nagpalab-ot man ini sang pagpasalamat sa mga miyembro sang iya partido kag sa mga bag-o nga napilian nga opisyal, nga naghatag sang daku nga suporta kag handum sa mga proyekto kag polisa nga magapaayo sang banwa.
Sa katapusan sang iya mensahe, nagpangayo si Valdemar sang padayon nga suporta halin sa publiko, samtang nagapanawagan nga magbinuligay ang tanan agud magmadinalag-on ang mga programa para sa Jamindan.
Interviewed by Bombo Francis Biñas
