ROXAS CITY – Opisyal na nga gin-inagurahan ang bag-o tukod nga barracks sang Philippine Army 3rd Infantry Division sa Camp Macario Peralta sa banwa sang Jamindan, Capiz.
Nangin dinapit nga bisita sa nasambit nga inagurasyon si Secretary Michael Lloyd Dino sang Office of the Presidential Assistant for Visayas.
Sa iya nga mensahe, gindayaw ni Dino ang liderato ni 3rd ID commanding general Maj. Gen. Dinoh Dolina ilabi na nga nakadihon ini sang plano nga pagpatukod sang nasambit nga barracks nga mahimo tiniran sang pamilya sang mga suldado.
Magluwas diri nabilib man si Dino sa pag-mentinar sang mga kakahuyan sa palibot sang kampo nga suno sa iya pwede na mangin eco-tourism destination.
Bangud sang kalapadon suno sa iya sang nasambit nga kampo, mahimo naman ini nga tukuran sang golf course.
Mahibaluan nga magluwas sa bag-o gin-inagurahan nga barracks, plano pa nga magtukod sang dugang nga barracks sa amo nga lugar agud mangin maayo ang akomodasyon sang igadugang nga pwersa sang hanay.
Gindugang pa naman ni Maj. Gen. Dolina nga handom sini nga mangin people-friendly camp ang nasambit nga kampo sa idalom sang iya liderato.
