Kadungan sa pagbukas sang Session sang Senado kahapon nga adlaw, gin-aprubahan ang bag-o nga committee chairmanships sang pila ka mga senador.
Lakip sa mga ginpili nga magapamuno sang tagsa ka komitiba sanday Robin Padilla para sa Public Information and Mass Media kag Cultural Communities and Muslim Affairs, kag Senator Loren Legarda para sa Culture and the Arts kag Basic Education.
Mangin chairperson man si Senator Pia Cayetano sang Ways and Means, Sustainable Development Goals, Innovation and Futures Thinking, kag Energy, samtang si Senator Bong Go naman ang magapamuno sang Health and Demography kag Sports.
Gin-assign naman kay Senator Joel Villanueva ang Higher, Technical and Vocational Education, samtang si Jinggoy Estrada ang mangin chairperson sang National Defense and Security, Peace, Unification and Reconciliation, kag Games and Amusement.
Ginbutang man si Senator Rodante Marcoleta bilang chairman sang Committee on Public Services.
Ang pagbag-o sa committee chairmanships kabahin sang reorganisasyon sang Senado kasunod sang pagbukas liwat sang sesyon, agud mapalig-on pa ang pagtalakay sang nagkalain-lain nga hagna kag mga isyu nga ginapangatubang sang pungsod.
