Wala sang narekord nga kaso sa Pilipinas sang bag-o nga COVID-19 variant nga ginatawag “Cicada” (BA.3.2), nga na-identify sa pila ka mga pungsod lakip na ang Estados Unidos sang Amerika,’ suno Department of Health (DOH).
Suno kay DOH spokesperson Undersecretary Albert Domingo, mas manubo ang kaso subong nga tuig kon ipaanggid sang nagligad nga tuig.
Dugang pa niya nga ang genomic sequencing para sa COVID-19 indi na masami bangud wala na ini ginakabig nga isa ka Public Health Emergency of International Concern (PHEIC).
Ang Cicada strain natukiban sang Nobyembre 2024 sa South Africa kag naghalin sa Omicron nga linya sang virus.
Suno sa World Health Organization (WHO), ang BA.3.2 na-monitor sa 23 ka mga pungsod kag wala pa sang ebidensya nga nagatuga ini sang mas grabe nga balatian, diagnostic failure, ukon mas manubo nga pagkaepektibo sang sunong nga antiviral kon ipaanggid sa iban nga mga linya sang Omicron.
Ginhatagan pagtamod sang WHO nga bisan pa nga ang BA.3.2 may “pronounced immune-escape profile,” wala pa ini nagahatag sang dugang nga risgo sa ikaayong lawas sang publiko kon ipaanggid sa nagalibot nga mga variant sang Omicron.
Suno kay Domingo, natural lamang nga may yara sang bag-o nga variant ang mga virus kaangay sang COVID-19.
Dugang pa niya, ginatutokan subong sang DOH ang mga balatian may kaangtanan sa mainit kag mamala nga panahon, subong man ang contingency planning para sa national health system sa atubang sang national energy emergency.
