Nagdugang sang tatlo ka bag-o nga dump trucks ang Roxas City Government agud mapabakod pa ang serbisyo sang syudad, ilabi na sa pagkolekta sang basura.
Sa interview sang Bombo Radyo kay Mr. Melvin Galagate, Head sang Roxas City Communications Group, iya ginpahayag nga ang tatlo ka bag-o nga dump trucks igahatag sa City Environment and Natural Resources Office ukon CENRO.
Suno kay Galagate, kinahanglan ang dugang nga mga truck bangod kulang na ang ginagamit sa pagkolekta sang basura. Ang iban man nga dump trucks nga yara sa operasyon subong indi na maayo ang kondisyon.
Pahayag pa ni Galagate, madamo sang basura ang ginakolekta adlaw-adlaw sa siyudad, kag importante nga mangin hapos kag organisado ang pagkuha sini.
Bangod sini, ginapahanumdom man sang City Government ang mga residente nga magsunod sa mga patakaran sa solid waste management kag magbuligay sa pagmintinar sang kalimpyo sa tagsa ka puluy-an kag barangay.
Gina-engganyo man ang mga pamilya kag barangay officials nga magkooperar sa City Government, bangod indi lamang ini masarangan sang City Government sang Roxas City kon magpadayon ang kadakuon sang ginakolekta nga basura kada adlaw.
Paagi sa pagbuligay sang City Government, barangay officials kag mga residente, ginapaabot nga mangin mas efficient ang pagkolekta sang basura kag mapabilin nga matinlo ang Roxas City.
