ROXAS CITY – Nagalaom sa gihapon si Board Member Eliuper Martinez nga maaprubahan sang Sangguniang Panlalawigan ang gina-request sini nga i-transfer ang pondo sang iya opisina sa opisina sang Provincial Administrator.
Sa interview sang Bombo Radyo kay Martinez ginpahayag sini nga naluoy na siya sa iya mga empleyado nga pila na ka bulan na nga wala maswelduhan.
Ginpahayag sini nga makapila ka-beses na ini naghinyo sa opisina ni Vice Gov. James Mitang Magbangua apang tubtob subong wala sa gihapon sini ginpirmahan ang ginpasa sini nga mga papeles.
Ginpanindugan pa sini nga gintudloan siya sang office of the governor sang iya dapat nga himuon.
Samtang, ginpahayag ni Vice Gov. James Mitang Magbanua nga wala sini gin-aprubahan ang gina-request ni Martinez bangud doble ang kontrata sini nga ginpadala sa iya opisina.
Suno kay Magbanua nga wala pa sini natapos ang daan nga kontrata may yara naman si Martinez nga gin-ubra nga bag-o kun sa diin wala na ini nagasantu rason nga ginpaliwat kag ginkwestyon ini sang bise gobernador.
Dugang pa ni Magbanua nga nagaatrasar man lang ang sweldo sang mga empleyado kun indi regular kag sala ang mga papeles nga ginapadala sa iya opisina.
Magluwas diri, bag-o lamang nagpasa si Martinez sa iya sang bag-o nga kontrata kun sa diin may yara pa sang mga salary adjustments rason nga iya gid ini ginatsekyar sang maayo.
Nahibaluan nga base sa daan nga kontrata sang mga empleyado ni Martinez napetsahan ini sang Hulyo 1 tubtob Disyembre 31.
Ginpahayag ni Magbanua nga wala niya ini ginpirmahan bangud indi ini pwede kag mabudlay na manabat sa mga nagakaigo nga ahensya nga naga-review sang disbursement nila.
Magluwas diri, sala ini nga proseso kag mahimo nga makompromisa sila bangud si Martinez ang kalakip sa Legislative Branch kag indi sa Executive Department kag ginasunod lamang sini kun ano ang nasaad sa Local Government Code.
