ROXAS CITY, CAPIZ – Ginpabugal ni Dr. Florencio Luching, Chief sang Roxas Memorial Provincial Hospital (RMPH), ang mga bag-o nga kagamitan pangmedikal nga ginpondohan sang Capiz Provincial Government.
Kalakip sa mga bag-o nga gamit ang 10 ka bariatric wheelchair, 20 ka stretcher nga may IV pole, 100 IV stands, kag duha ka anaesthesia machines.
Sa interview sang Bombo Radyo Roxas kay Dr. Luching, iya ginpahayag nga ang mga bag-o nga medical equipment ang sabat sa madugay na nga reklamo sang mga pasyente angut sa kakulangan sang beds kag wheelchair sa ospital.
Sun okay Dr. Luching, naglab-ot sa ₱15 million ang kabug-usan nga balor sang mga nasambit nga kagamitan.
Dugang pa sang natungdan, yara sa 150% ang occupancy rate sang ospital kag apisar may kapasidad lamang ini nga magbaton sang 147 nga pasyente, nagdangat sa 250 tubtob 260 nga pasyente ang sa karon na na-admit sa RMPH.
Ini ang resulta sang direktiba ni Gobernador Fredenil Castro nga indi pagbalibaran ang sin-o man nga pasyente, ilabi na sa mga nabudlayan sa pinansyal.
Samtang, nagapadayon ang construction kag renovation sang bag-o nga pasilidad sa Roxas Memorial Provincial Hospital – Lanot, tinutuyo sang madasig nga ma-transfer ang operasyon sang ospital sa mas daku kag modern nga bulidling agud mas mapaayo ang serbisyo sa mga Capizeño.
– Interviewed by: Bombo Jessa Mae Siman De Los Santos
