Ginpirmahan sang Local Government Unit sang Roxas City kag sang Department of Education (DepEd) ang Memorandum of Agreement para sa pagtukod sang dugang nga mga classroom sa nagkalain-lain nga prayoridad nga eskwelahan sa syudad.
Suno kay Roxas City Mayor Atty. Ronnie Dadivas, katumanan ini sang tikang sang lokal nga gobyerno agud maproseso kag ma-release ang pondo nga pagagamiton sa proyekto.
Ang mga bag-o nga classroom ginapaabot nga makabulig sa pagsolbar sang kakulangan sang mga pasilidad sa mga pampubliko nga eskwelahan.
Nagpahayag man ang mga opisyal nga ila pagabuligan upod sa DepEd Roxas City agud masuguran ang konstruksyon sa labing madali nga tion.
Pinaagi sa sini nga proyekto, ginapaabot nga mangin mas luwas kag mas komportable ang pag-eskwela sang mga kabataan samtang ginaatubang ang nagapadayon nga kakulangan sang mga classroom sa syudad.
Sa subong, wala pa ginpahibalo ang eksakto nga kadamuon sang mga classroom nga ipatindog kag ang kabug-usan nga kantidad sang pondo nga igatugyan para sa proyekto.
