Pagatutukan sang bag-o nga Officer-in-Charge sang Pontevedra Municipal Police Station (MPS) ang pagpabilin sang kalinong kag katawhay sa banwa.
Sa interview sang Bombo Radyo kay Police Captain Ma. Fe Umiten, iya ginpahayag nga isa ka daku nga dungog para sa iya ang responsibilidad nga pamunuan ang mga kapulisan sa banwa sang Pontevedra.
Suno kay Umiten, mangin prayoridad ang mabaskog nga kampanya batok sa kriminalidad, iligal nga droga, iligal nga armas kag ang padayon nga operasyon batok sa mga wanted person.
Nagpasalig man ini nga mapadayon ang mataas nga standard sang pagserbisyo sa publiko agud mapabakod pa ang pagsalig sang mga pumuluyo sa kapulisan.
Matandaan nga pinaagi sa Administrative Relief Order nga ginpapanaog ni Police Brigadier General Jack Wanky Tuaño, Regional Director sang Police Regional Office 6, gin-relieve sa pwesto si Police Captain Mark Anthony Garcia bilang hepe sang Pontevedra MPS, kag ginpahamtang bilang Officer-in-Charge si Police Captain Ma. Fe Umiten.
