Ginpasiguro sang bag-o nga Officer-in-Charge (OIC) sang Capiz Police Provincial Office (PPO), PCOL David Cachumbo Jr., nga iya palig-unon ang kampanya batok sa kriminalidad kag padayon nga siguruhon ang public safety kag peace and order sa bug-os nga probinsya sang Capiz.
Ini ang ginpahayag ni Cachumbo sa iya pagbisita sa regular nga sesyon sang Sangguniang Panlalawigan sang Capiz, kun sa diin iya ginpakilala ang iya kaugalingon bilang bag-o nga OIC Provincial Director.
Suno kay Cachumbo, ang iya 30 ka tuig nga eksperyensya sa Philippine National Police sa nagkalain-lain nga mga assignment ang iya mangin pundasyon sa pagdumala sang Capiz PPO.
Ginpasalig man sini nga mangin propesyonal, episyente kag transparent ang pagpanguna niya sa kapulisan sang probinsya.
Ginpahayag man sang opisyal nga bukas ang iya opisina sa koordinasyon kag pagpakig-angot sa local Government, lakip na ang Sangguniang Panlalawigan, agud mas mapalig-on ang implementasyon sang mga programa para sa seguridad kag kalinong sang mga Capiznon.
Dugang pa ni Cachumbo, handa siya nga gamiton ang iya malawig nga eksperyensya sa pagpatuman sang mga polisiya kag programa nga magapabakod sang police visibility, crime prevention, kag pagserbisyo sa publiko.
Mainit man siya nga ginbaton sang mga miyembro sang Sangguniang Panlalawigan, sa pagpanguna ni Vice Governor James “Mitang” Magbanua, nga nagpabutyag sang suporta sa mga inisyatibo sang Capiz PPO nga nagatinguha nga mapabilin ang malinong kag luwas nga komunidad sa probinsya.
