ROXAS CITY – Ginkumpirma sang tagpamaba sang Archdiocese of Capiz kag team moderator sang St. Catherine of Alexandria sa banwa sang Mambusao ang pila ka mga pagbag-o sa pagsulundan sa Simbahan Katolika kasunod sa pagbalik sang pila ka religious activities nga ginalakipan sang misa sa Miyerkules nga adlaw Hunyo 10, 2020.
Ginpahayag ni Reverend Father Jose Arturo Emilio Arbatin, santu sa ginpaguwa nga Circular No. 15 ni Archbishop Jose Advincula Jr., kinahanglan nga ipatuman ang general provision sa health and hygiene protocols, agud malikawan ang paglapta sang COVID-19.
Kalakip sa protocol nga istrikto nga ipatuman sa pagpatigayon sang misa ukon religious activities amo ang 50% nga sitting capacity sa simbahan sa diin kinahanglan man nga i-obserbar ang physical/social distancing.
Magapahamtang man sang alcohol kag footbath antes magsulod sa simbahan.
Dumilian man ang pagtambong sa misa ukon anuman nga religious activities sang mga pamatan-on nga naga-edad sang 21 anyos panubo kag 60-anyos pataas, nagabusong kag mga yara sang mga balatian.
Magamit man sang thermal scanner sa magasulod sa Simbahan agud masiguro nga wala sila sang lagnat.
Ginpahanumdum man ni Arbatin ang mga sumilimba nga likawan ang pagtandog sa imahen sang mga santos.
Pag-abot sa mga halad, indi na kinahanglan nga magkadto pa sa altar ang nagahalad bangud may ginpreparar nga box nga ila mahimo mahulugan sang ila mga halad ukon donasyon.
Samtang magapadayon ang pagpangalawat, kinahanglan lamang nga magdistansiya sa mga lay ministers ukon pari kag dapat ihumlad ang kamot kag indi ang baba.
Amo man sa pagkumpisar, kinahanglan lamang may distansiya sa pari kag maggamit sang face mask bangud hugot nga ipatuman ang No Face Mask No Entry Policy sa Simbahan.
Sa magapakasal kag magapabunyag, mangin limitado na lamang ang entourage kag magatindog nga Ninang kag Ninong, amo man sa pagpalubong wala na sang picture taking sa simbahan matapos ang misa.
Pahanugutan man ang fiesta apang kinahanglan i-obserbar ang social distancing.
Ginpaathag pa ni Arbatin nga temporaryo lamang ini bangud sa ginapangatubang nga pandemya sang bilog nga kalibutan.
Nagalaum ini nga mangin masinulundon lamang ang tanan sa ipatuman nga mga protocols, bangud luyag lamang nila nga masiguro nga hilway sa COVID-19 ang mga pumuluyo
