Prioridad sang bag-o nga Regional Director sang Bureau of Fire Protection (BFP) Region 6 nga si Fire Chief Superintendent Edwin P. Vargas ang pagpasangkad sang fire suppression activities kag ang mas madasig nga pagresponde sa mga emergency alert sa bug-os nga Western Visayas.
Sa interview sang Bombo Radyo kay Vargas, iya ginpahayag nga lakip sa mga tikang nga iya pagatutukan amo ang pagahugton ang koordinasyon sa mga eskwelahan, komunidad kag mga barangay officials agud mapalapad ang kampanya sa fire prevention kag disaster preparedness.
Suno kay Vargas, pinaagi sa mas maayo nga koordinasyon kag aktibo nga partisipasyon sang komunidad, mahimo nga mapadasig ang pagresponde sang BFP sa nagkalain-lain nga emerhensya.
Ginpahayag man sini nga padayon ang BFP Region 6 sa pagpatuman sang mga programa nga makaprotekta sa publiko paagi sa epektibo nga fire suppression kag emergency response.
