Natukiban sang Argentine researchers ang isa ka sahi sang buwaya nga nabuhi sang masobra 70 million years na ang nagligad sa Southern Patagonia. Suno sa pagtuon, isa ka mapintas nga predator ang buwaya nga mas nagatinir sa duta sang sa tubig kag posible nga nagapangaon sang magagmay tubtob katamtaman nga kadakuon sang dinosaur.
Gipangalan ini nga Kostensuchus Atrox, nalakip sa pamilya nga Peirosauridae nga madugay na nga nadula. Natukiban ini malapit sa El Calafate, Santa Cruz Province sa pagpanguna sang mga paleontologist nga sanday Fernando Novas kag Diego Pol, upod ang pila ka mga Japanese researchers.
Lakip man sa nakit-an ang halos kumpleto nga bungo nga may laba nga 50 sentimetro kag kalansay. May yara sang kabug-osan nga kalaba-on nga masobra 3 metro ang nasambit nga buwaya sa diin may yara man ini sang mabakod nga panga kag masobra 50 ka mga taliwis nga ngipon nga nagalab-ot sa 5 sentimetro ang laba.
Bangud sini, ginakabig ang buwaya nga isa ka mabaskog nga predator sang sadto-anay nga panahon.
Suno kay Novas, pinasahi ang nawong sang amo nga buwaya kun ipaanggid sa mga moderno nga buwaya. Mataas ang iya nga bungo kag ang mata sini ang nagaatubang sa kilid , senyales nga mas nagatinir ini sa duta sang sa tubig.
Dugang pa sang mga eksperto, ang pagkatukib sang amo nga sapat ang nagapamatuod nga madamo kag nagkalain-lain pa nga sahi sang buwaya ang nagapabilin sa South America antes ang mass extinction 66 million years ang nagligad.
