ROXAS CITY – Nagtrending sa karon sa social media ang bag-ong bun-ag nga lapsag nga ginbilin sang wala nakilala nga iloy sa top down na tricycle sa Barangay Tanza Guwa, Roxas City.
Matapos ma-post sa facebook page sang Bombo Radyo Roxas ang laragway sang baby girl nga ginsulod sa pula nga eco-friendly bag nga may kaupod nga pacifier, madamo ang gilayon nagpahayag sang interes nga adoptahon ang nasambit nga bata.
Isa man sa mga nagpakita sang kahandaan nga adoptahon ang lapsag amo si Mr. Vedencio Daliva, ang nakakita sa baby girl sa top down nga tricycle.
Nahibaluan nga matapos magbugtaw ni Daliva gilayon ini nga nagguwa sa ila balay para magbakal sang kape, apang ginkatingala sini sang makita nga nagahulag ang pula nga grocery bag nga nakatungtong sa top down tricycle ni Culasito Daliva.
Bangud sa kuryusidad iya ini ginpalapitan apang daku ang iya kakibot sang makita nga lapsag ang unod sang grocery bag.
May nakita pa nga mga dugo sa butkon sang lapsag nga matapos matinluan sang pila ka mga kababainhan sa lugar, gindala na sa ospital para mahatagan sang atensyon medikal.
Padayun sa karon ang imbestigasyon sang mga pulis para makilala ang nanay sang nasambit nga baby girl.
