Gin-anunsyo sang gin-alegar anay bagman ni Vice President Sara Duterte nga si Ramil Madriaga nga handa kag bukas siya nga magtestigo sa ano man nga impeachment proceedings kun ipatawag sang Senado, Kongreso, ukon sang Office of the Ombudsman.
Sa isa ka news forum, ginpahayag sang abogado ni Madriaga nga si Atty. Raymund Palad, nakahanda ang iya kliyente nga magtuman kun makabaton sang subpoena.
Gin-ako man ni Palad nga nakibot siya sang nahibaluan nga nalakip ang affidavit ni Madriaga sa mga reklamo sa impeachment batok sa bise presidente.
Suno sa iya, nahibaluan lamang sini paagi sa mga news report ang tuhoy sa paggamit sang affidavit sa nasambit nga kaso.
Sa iya affidavit, gin-akusahan ni Madriaga si Vice President Duterte nga gin-alegar nagagamit sang kwarta halin sa mga POGO kag drug dealers agud pondohan ang iya kampanya sa eleksyon sa 2022.
Ginbuyagyag man ni Palad nga may mga opisyal nga naghingyo nga ma-interview si Madriaga angut sa iya affidavit.
Suno sa iya, nagpamangkot si Liberal Party-List Rep. Leila de Lima kon pwede niya ma-interview ang iya kliyente nga indi direkta nga gina-angot sa impeachment proceedings.
Ginkumpirmar man ni Palad nga sang una naghingyo si anay Senador Antonio Trillanes IV nga magbisita kay Madriaga agud istoryahan ang kaundan sang iya affidavit.
Samtang, ginpahayag sang abogado nga magapasaka sila sang aplikasyon nga ipaidalum sa Witness Protection Program si Madriaga bangud sa gina-alegar nga mga pamahog nga ginabaton sini sa iya kabuhi.
