ROXAS CITY – Ginbuyagyag sang chairperson kag tagpamaba sang Bagong Alyansang Makabayan Capiz nga wala sang kamatuoran ang pahayag kag ginbuy-an nga mga tinaga ni Former Activist Jeffrey Celiz ukon Alyas “Ka-Eric” sang damlag lang.
Sa interview sang Bombo Radyo kay Darlene Blando Surriga sang Bagong Alyansang Makabayan ginpahayag sini nga lunsay mga patalang kag kabutigan lamang ang mga ginasugid ni alyas Ka-Eric.
Suno kay Surriga nga wala sang kahilabtanan ang mga progresibo nga mga grupo sa pagpatigayon sang mga kalakasan sang rebelde nga mga grupo ukon mga terorista kapareho sang CPP-NPA.
Ginpahayag sini nga ginahimo lamang sang progresibo nga mga grupo nga mabatian ang ila tagsa ka mga sentimyento kag pamatian sang mga opisyal nga yara sa gobyerno.
Ginkompirmar man sini nga peke tanan ang mga impormasyon ni alyas Ka-Eric bangud wala sang kahilabtanan ang progresibo nga mga grupo sa pagpamahog ukon pagpamatay sa mga inosente nga mga tawo.
Dugang pa sini nga indi mauntat ang problema kag kurapsyon sa pungsod bangud sa mga kurakot nga mga opisyales sang gobyerno.
Gintumod man ni Surriga ang Duterte Administration kun sa diin nagapakig-alyansa sa mga kapungsoran kapareho sang China kun sa diin naapektuhan ang pungsod.
Magluwas diri ang mga ginapatuman nga mga laye nga ginaalegar indi man makabulig sa pagpauswag sa pungsod Pilipinas.
Matandaan nga ginpahayag ni alyas Ka-Eric nga magkatuhay nga mga grupo, organisasyon ukon progresibo nga mga grupo ang naga-enganyo sa pila ka mga indibidwal nga mag-upod sa hanay sang rebelde nga grupo.
Si alyas Ka-Eric ang isa ka military whistleblower kag nag-atubang sang damlag lang sa senate hearing kun sa diin ginsabat sini ang isyu natuhoy sa red tagging.
