ROXAS CITY – Ginakabig nga isa ka massacre ang natabo nga nagresulta sa kamatayon sang siyam ka mga ginapahayag miyembro sang Communist Terrorist Group (CTG) matapos gin-implementar ang Search Warrant sang mga katapo sang kapulisan kag militar sa banwa sang Tapaz, Capiz.
Ini ang ginpahayag ni Ms. Darlene Surriga, sang Bagong Alyansang Makabayan sang mainterview sang Bombo Radyo Roxas.
Suno kay Surriga nga hugot nga ginakondenar sang mga progresibo nga grupo ang kamatayon sang siyam ka mga persona matapos naluthangan sang tion nga nagapatigayon sang Simultaneous Search Warrant ang mga katapo sang otoridad sa pito ka mga barangay sa amo nga banwa.
Ginpahayag sini nga padayon sila nga magasinggitan sa gobyerno agud maangkon sang mga nagkalamatay ang matuod nga hustisya.
Nagpanawagan naman ini kay Capiz Governor Esteban Evan Nonoy Contreras nga tutukan ang imbestigasyon kag hatagan sang nagakaigo nga atensyon ang natabo sa mga biktima.
Nagapati naman ini nga “planted” ang gin-ubra sang mga kapulisan kag militar bangud wala sang ikasarang ang mga ini nga maghupot sang dalagkuan nga mga armas luthang.
