Matapos mag-resign sa Independent Commission for Infrastructure (ICI), bilang special adviser, ginpanginwala ni Baguio City Mayor Benjamin Magalong ang mga alegasyon nga naga-angut sa iya sa korapsyon sa syudad.
Sa statement sang Sabado, ginpahayag ni Magalong nga mabudlay ang iya desisyon nga maghalin sa ICI apang kinahanglan suno sa iya agud mapabilin ang kredibilidad sang komisyon.
Dugang pa nga ginhatagan pagtamod sang alkalde nga wala siya sang kahilabtanan sa mga kwestyonable nga proyekto kag wala sang “conflict of interest” sa iya appointment sa ICI.
Kaupod sang pagbiya, ginreport ang pag-intra ni Magalong sa duha ka proyekto sa imprastraktura sang Baguio City sang 2022 upod sa mag-asawa nga kontraktor nga sanday Pacifico ‘Curlee’ kag Cezarah ‘Sarah’ Discaya.
Angut sini, ginsuspender man ni DPWH Secretary Vince Dizon ang anum ka mga opisyal sang Baguio District Engineering Office.
Una na nga nagmando si Magalong sang separado nga imbestigasyon sa Sangguniang Panlungsod sang Baguio para sa mga delayed nga proyekto kaangay sang tennis court kag parking lot sa Burnham Park.
Madumduman nga si Magalong ang gin-appoint sa komisyon sang Setyembre 13 ni Presidente Ferdinand Marcos Jr., kaupod ni anay Supreme Court Justice Andres Reyes Jr., anay DPWH Secretary Rogelio “Babes” Singson, kag SGV executive Rossana Fajardo.
Wala pa sang opisyal nga pahayag si Presidente Marcos sa pagbiya sa pwesto, apang gintawag ini sang iya press office nga “makaluluoy.”
Sa iya katapusan nga pahayag, nagpanawagan si Magalong sa mga Pilipino nga indi pagpabay-an nga kawaton sang mga corrupt officials ang bwas damlag sang mga pamatan-on kag bwas damlag sang pungsod.
