ROXAS CITY – Ginkakibot sang isa ka basurero nga may tul-an sang ginapatihan sini, iya sang tawo nga nasapwan sa sanitary landfill sang Barangay San Jose, syudad sang Roxas.
Sa interview sang Bombo Radyo kay Joey Patricio, 33-anyos kag isa sa mga basurero sa lugar, suno diri nga samtang nagahusay na ang mga ini, may nakita siya nga isa ka sako sang semento.
Ginbubo’ sini ang unod sang sako kag tuman nalang ang iya kakibot nga bagul sang tawo, tul-an sang kamot kag tiil, kalo, driver’s license kag medyas ang unod sini.
Gindugang pa sini nga sa ila pagtsekyar, nakapangalan kay Wilson De Andres kag may address nga Barangay Baybay, Roxas City ang nasambit nga valid ID.
May posibilidad suno diri nga nagikan ini sa sementeryo kag ginhaboy sa nasambit nga talambakan sang basura sa syudad.
Sa karon, ginaimbestigahan na sang mga otoridad ang nasambit nga tul-an.
