Nagluya na kag nahimo na nga low pressure area ang Bagyo Basyang samtang padayon ini nga nagahulag pa westward sa ibabaw sang Dagat Sulu, suno sa PAGASA.
Ang sentro sang low pressure area nahamtang sa 105 kilometers south east sang Cuyo, Palawan.
Base sa forecast sang PAGASA, wala na sang Tropical Cyclone Wind Signals nga epektibo sa bisan diin nga bahin sang pungsod. Apang, ang LPA padayon nga magadala sang mabaskog nga pag-ulan-ulan sa pila ka mga lugar.
Samtang ang Northeast Monsoon ang ginalauman nga magadala sang mabaskog nga paghuyop sang hangin sa kalabanan nga bahin sang Luzon, Western Visayas, pila ka bahin sang Negros Island Region, kag Zamboanga del Norte, partikular sa mga baybayon kag nabukid nga lugar nga expose sa hangin.
Nagpaandam man ang PAGASA sa makatalagam nga kahimtangan sang kadagatan kag nagpanugyan sa mga mangingisda kag magagmay nga mga sakayan nga indi magguwa kag magpabilin nga alerto.
