Nangin isa na ka typhoon ang Bagyo Francisco, nga may international name nga “Mekkhala,” samtang yara sa sulod sang Philippine Area of Responsibility (PAR), suno sa Philippine Atmospheric, Geophysical and Astronomical Services Administration (PAGASA).
Ang sentro sang bagyo ang nahamtang sa kalayuon nga 820 kilometros northeast sang Eastern Visayas nga may kabaskugon sang hangin nga 120 kph kag pagmadlos tubtob 150 kph.
Suno sa PAGASA, ginalauman nga maga-intensify pa gid si Francisco kag mahimo nga malab-ot ang peak intensity sini sa Martes.
Mahimo man nga mapasaka ang Tropical Cyclone Wind Signal No.1 sa pila ka bahin sang Cagayan, Babuyan Islands kag Batanes.
Apisar nga manubo ang posibilidad sang bagyo nga direkta nga makaapekto sa pungsod, mahimo pa nga mapabaskug sini ang southwest monsoon nga magadala sang pag-ulan sa pila ka bahin sang Luzon kag Visayas sa masunod nga mga inadlaw.
