Ginpaandaman sang Department of Science and Technology (DOST) ang publiko batok sa epekto sang bagyo Nando sa daku nga bahin sang Luzon.
Suno kay DOST-PAGASA Asst. Weather Services Chief Chris Perez, dako ang posibilidad nga magadala ini sang malapnagon nga pag-ulan kag mabaskog nga hangin, bangud sa padayon nga pagbaskog sang bagyo, samtang yara ini sa eastern seaboard sang pungsod.
Dugang pa sini, dako ang posibilidad nga lubos ini nga makalab-ot sa typhoon category subong nga adlaw kag padayon nga magbaskog samtang nagsubay sa kadagatan sang pungsod.
Pag-abot sang Lunes, mahimo ini nga mangin supertyphoon kon padayon ini nga magbaskog – ang labing una nga supertyphoon nga ma-eksperyensyahan sang Pilipinas subong nga tuig.
Wala man ginadula sang weather bureau ang posibilidad nga maga-landfall ang bagyo sa anuman nga isla nga kabahin sang Calayan ukon Babuyan Group of Islands sa Northern Cagayan.
Pahayag pa ni Perez, mahimo ini matabo sa Lunes sang gab-i ukon Martes sang aga sa masunod nga semana.
Ginapaandaman naman ang pila ka mga lugar sa probinsiya sang Cagayan, Isabela, Batanes, kag iban pa nga kaiping nga probinsya, bangud sang mabaskog nga hangin kag ulan nga dala sang bagyo.
Posible nga malab-ot ang pinakamataas nga wind signal number sang nasambit nga bagyo sa Wind Signal No.5.
Ginalauman man nga mapasaka ang Signal No.1 subong nga adlaw sa pila ka mga lugar sa Northern Luzon.
