Nagbaskog bilang isa ka super typhoon ang tropical cyclone nga may international name nga “Bavi”, samtang padayon ini nga nagahulag pa-West sa guwa sang Philippine Area of Responsibility (PAR), suno sa Philippine Atmospheric, Geophysical and Astronomical Services Administration (PAGASA).
Base sa weather bulletin sang PAGASA mga las 10 sang gab-i, ang super typhoon ang may maximum sustained winds nga 185 kph malapit sa sentro kag pagmadlos nga nagalab-ot sa 230 kph.
Ginabulubanta nga yara sa 3,090 kilometros ang sentro sini sa nasidlangan sang Eastern Visayas kag nagahulag padulong nakatundan sa kadasigon nga 20 kph.
Sa subong ang easterlies ang naga-apekto sa malain nga panahon sa pungsod.
Suno sa state weather bureau, mahimo nga makasulod ang bagyo sa PAR sa Miyerkules, Hulyo 8, kag tawgon nga “Inday.”
Dugang pa sang PAGASA, dako ang posibilidad nga magalabay ang super typhoon malapit sa Northern Luzon sa masunod nga semana, kabangdanan sang posibilidad nga magtaas ang tropical cyclone wind signals sa malapad nga bahin sang rehiyon, subong man sa pila ka mga lugar sa Central Luzon.
