Nagsaka na sa 8.5 million ka indibidwal ukon kabaylo sang 2.1 million nga pamilya ang apektado sang pagpanglaslas sang bagyong Kristine kag Leon.
Sa ulihi nga datos sang National Disaster Risk Reduction and Management Council (NDRRMC), nagdangat na man sa ₱ 7.3 billion ang kahalitan sang mga nag-agi nga kalamidad sa sektor sang imprastraktura.
Nakabalhag man sang 150 ka napatay kun sa diin 20 ang kumpirmado nga napatay bangud sa bagyo, samtang pulo naman ang nakumpirma gikan sa 134 nga nagkalapilasan kag 20 naman ang missing.
Sa datos naman sang Department of Agriculture (DA), nagdangat na sa ₱ 5.75 billion ang ginbilin nga halit sang bagyo sa 109,871 nga ektarya sang talamnan kun sa diin 38,466 nga ektarya ang wala na sang tyansa nga marekober pa samtang 71,405 nga ektarya ang pwede pa nga masalbar.
Sa kabug-usan, yara na sa 557,851 metric tons sang produksyon ang nadula sa mga sakahan nga nakaapekto sa karon sa 131,661 nga mangunguma kag tripulante.
Bangud sa lapnagon nga epekto sang bagyo, nagdangat na sa 241 ka siyudad kag munisipalidad sa pungsod ang ginpaidalom sa state of calamity.
