ROXAS CITY – Nagdangop sa Bombo Radyo ang isa ka iloy agud ireklamo ang tuman ka mahal nga pagpanukot para sa ambulansiya kag sala nga findings sang doktor sang Bailan District Hospital sa iya naaksidente nga anak.
Suno kay Nanay Inday, naaksidente sa motorsiklo ang iya anak sadtong Disyembre 24, 2019 kun sa diin nasamaran ang ulo sini rason nga gindala nila sa amo nga ospital.
Ginpahayag sang iloy nga ginhambalan siya sang wala makilala nga doktor nga nakaangkon sang ‘fracture’ ang ulo sang ila anak gani kinahanglan nila ini nga ma-refer sa iban nga ospital.
Nakibot pa ang iloy sang ginhambalan sila sang nurses nga paloadan ang ila cellphone agud gamiton para makatawag sa mga ospital sa siyudad sang Roxas kag Iloilo kun sa diin mahimo dal-on ang pasyente.
Suno diri nga naghambal siya sa doktor nga sa siyudad sang Roxas niya dal-on ang anak apang nag-insister ini nga kinahanglan nga sa siyudad sang Iloilo nila ini ma-refer bangud yara sa kritikal nga kondisyon ang iya anak.
Agud gilayon nga mabulong ang anak nagpasugot na lamang ang iloy apang nakibot ini sang ginapabayad siya sang P5, 000 para sa ambulansiya nga magadul-ong sa ila.
Sang iya gin-usisa kun diin magakadto ang kwarta, didto kag gintuad sa iya nga ang P1, 500 ang igahatag sa nurse nga magaupod samtang ang P3, 500 ang gamiton naman para sa krudo sa ambulansiya.
Suno kay Nanay Inday naghinyo pa siya nga kun mahimo panubuan ang iya balaydan apang wala gid ini ginpasugtan.
Sang nagbayad na ini sa cashier, natingala man ang iloy nga wala ini gin-issuehan sang resibo.
Naglain pa ang buot sang ginang bangud sang pag-abot nila sa Western Visayas Medical Center sa Iloilo, ginhambal sang doktor nga wala man sang ‘fracture’ kag napak-an lamang ang panit sa ulo sang iya anak.
