ROXAS CITY — Anum ka mga tahi sa natuo nga kilay ang naagum sang isa ka embalsamador matapos nga ginlabo sang iya kaupod man nga embalsamador sang wala sila magkasugot sa baisay kun sin-o ang gwapo sa ila nga duha sa Barangay Poblacion Ilawod, Panay, Capiz.
Ginkilala ang biktima nga si Teofisto Villar sang Barangay San Esteban, Pilar samtang ang suspek amo si Rexson Alibio sang Barangay Malapad Cogon, Sigma, Capiz.
Base sa impormasyon, ara na ang duha sa kainitan sang ila pag-inum sang nagbais sila kun sin-o ang guwapo sa ila nga duha.
Bangud posible indi magpasugot si Alibio nga si Villar ang guwapo sa iya, hinali sini ginkuha ang grass cutter kag ginlabo sa natuo nga kilay ang biktima.
Ginpadangat sa ospital ang biktima samtang nadakpan naman sang otoridad ang suspek, apang ginhilway man ini sang nag-execute sang affidavit of non interest si Villar nga nagapatimaan nga indi na siya magpasaka sang kaso.
