Arestado ang isa ka bakasyonista matapos nga nagpangbuno sang tatlo ka mga persona sa Barangay Agtanguay, Dao, Capiz.
Ang biktima amo sanday alyas ‘Fel’, 26-anyos; alyas ‘Nel’, 25-anyos; kag alyas ‘Joe’, 28-anyos nga lunsay residente sang nasambit nga lugar.
Samtang, ang suspek amo si alyas ‘Niko’, yara sa legal nga pang-edaron, kag residente sang Barangay Cabugao, Pavia, Iloilo.
Sa interview sang Bombo Radyo kay Police Captain Rey Contreras Dordas, Hepe sang Dao Municipal Police Station, iya ginpahayag nga samtang naga-inuman ang mga biktima, hinali nalang nga nag-abot ang suspek kag may nagluntad nga komosyon sa magtimbang nga bahin.
Suno kay Dordas, bangud sang komosyon nga natabo, nagdesisyon ang mga biktima nga magpadulong nalang kuntani sa isa ka peryahan apang liwat ini sila nga ginsundan sang suspek kag liwat nga may natabo nga komosyon sa diin nga natigayon nga nabun-an ang mga biktima.
Bangud sa pagpangbuno, nag-angkon sang nagkalin-lain nga pilas sa lawas ang tatlo ka mga biktima.
Gilayon ini nga ginpangdala sang ila nga mga himata sa Dao District Hospital para sa nagakaigo nga pagbulong kag sa subong, yara na sa estable nga kondisyon.
Samtang, gindakop naman sang mga Barangay Tanod kag Barangay Officials ang suspek kag ginsurrender sa mga kapulisan.Sa subong, nagapabilin sa Dao Municipal Police Station ang suspek kag natalana mnga pasakaan sang kaso sang tagsa ka mga pamilya sang biktima.
Interviewed by Bombo Vinz Lingco Deocampo | via Zona Libre
