ROXAS CITY – Sa nagahilapit nga All Soul’s Day ukon pista minatay, matumal pa sa karun ang pabaklanay sang mga bulak sa Teodoro Arcenas Trade Center (TATC).
Sa interview sang Bombo Radyo sa flower vendor sa nasambit nga merkado nga si Marycon Bueno, 58-anyos kag residente sang Barangay Milibili, Roxas City, ginpahayag sini nga mahina pa sa karun ang iya benta bangud malaka pa lamang ang nagabakal sa iya sang bulak.
Suno kay Bueno, sa iya masobra 10 ka tuig nga pagbaligya sag bulak masami nga nagadugok ang mga bumalakal sumugod Oktobre 29 tubtob 31.
Mahibaluan nga nagasugod sa P150.00, P200.00, P250.00, kag P300.00 ang pinakamanubo nga presyo sang bulak ang iya ginabaligya depende sa arrangements.
Samtang, mahimo naman nga magbakal sang per piece nga bulak kung sa diin nagapresyo sang P35.00 ang isa kag 3 P100.00.
Pahayag pa ni Bueno nga halos wala ini siya sang ginapauli sa karun bangud tuman ka tumal ang baklanay sang bulak sa iya puwesto.
