ROXAS CITY – Gintupok sang kalayo ang isa ka balay sa Barangay Malag-it, Pontevedra, Capiz.
Totally burned ang semi-concrete nga balay nga ginapanag-iyahan ni Amelita Dolor Balasa, 60 anyos sang nasambit man nga lugar.
Suno kay Balasa nga nakibot na lamang siya sang gintundaan nga nasunog ang iya balay bangud naglakat ini agud magbaligya sang kakanin.
Wala suno sa iya sang tawo sa balay sang iya ini ginbay-an bangud yara sa siyudad sang Roxas ang iya duha ka mga apo bangud naga-review ang mga ini.
Natingala si Balasa kun sa diin naghalin ang kalayo bangud wala man sang baga nga nabilin sa ila dapugan matapos ang iya pagluto kag napatay man sini ang ila main switch sang ila kuryente.
Suno naman kay Fire Officer 1 Jonel Daniel, imbestigador sang Pontevedra Municipal Fire Station, nagaguwa sa ila imbestigasyon nga leakage sang kuryente ang gintunaan sang kalayo.
Wala suno sa iya na patay ang main switch sang balay nga kabaliskaran sa pahayag ni Balasa.
Nagalab-ot sa kapin P30,000 ang kabug-usan nga kahalitan sang nasambit nga sunog.
