BOMBO ROXAS – Ginpaarakan sang bala sang armas luthang ang balay sang 73-anyos nga mangunguma sa Barangay Gibato, Dumarao, Capiz.
Ginkilala ang tag-iya sang balay nga si Ernesto Cuyong sang amo nga lugar.
Sa interview sang Bombo Radyo Roxas kay Police Staff Sergeant Salvador Facto Jr., imbestigador sang Dumarao Municipal Police Station nagaguwa sa inisyal nga imbestigasyon nga posible duha ka wala matumod nga mga persona ang nagluthang sa balay ni Cuyong.
Narekober sang mga kapulisan ang walo ka basiyo sang bala sang .45 Caliber nga armas luthang kag duha ka basiyo naman sang Shotgun.
Suno sa biktima nga nakabati lamang sila sang asud-asud nga lupok sang armas luthang nagikan sa ila balay.
Sa pagtsekyar sang biktima, nakita na lamang sini ang mga igo sang bala sang armas luthang sa haligi sang iya balay.
Nahibaluan nga wala ini sa sulod sang iya balay sang natabo ang insidente bangud ginapahayag nga yara ini sa balay sang iya bata nagtulog rason nga wala sang malain nga natabo sa biktima.
Samtang, ginpahayag naman sang biktima nga may yara ini na-kontra bangud sa duta.
Sa karon, indi pa matumod sang mga kapulisan kun ano ang motibo sang mga suspek sa tuyo nga pagpatay sa biktima.
Padayon naman ang ginapatigayon nga hot pursuit operation sang mga kapulisan agud matumod ang mga suspek nga responsable sa nasambit nga krimen.
