ROXAS CITY – Ginpasakaan na sang panumbungon nga Robbery sa City Prosecutors Office ang apat ka mga suspek sa pagpangawat sa balay sang mag-asawa nga prosecutor sa Barangay Banica, Roxas City.
Nakaaresto na sa karon sa Roxas City Police Station ang tatlo sa apat ka mga suspetsado nga sanday Rodney Parreñas, 21 anyos; John Mark Pardona, 21 anyos, lunsay mga residente sang Barangay Cagay, kag Arjan Villegas, 18 anyos sang Barangay Culasi, Roxas City samtang padayon naman nga ginaayam sang mga kapulisan ang isa pa ka suspek nga si Jads Manican nga ginapahayag isa ka notoryus nga kawatan.
Sa interview sang Bombo Radyo kay Police Lieutenant Colonel Dante Tayco, hepe sang Roxas City PNP, ginpahayag sini nga ginsulod sang mga suspek ang balay nga ginapanag-iyahan sang mag-asawa nga sanday Assistant City Prosecutor Randy kag Sheryl Billanes.
Nataban sang mga suspek ang apat ka mga goma sang salakyan, apat ka mags, isa ka pump kag mangin ang tsinelas ni Randy ang wala ginpalampuwas sang mga kawatan.
Natukiban na lamang sang mag-asawa nga Billanes nga ginsulod sila sang kawatan sang natalupangdan nga wala na ang tsinelas ni Randy sa guha sang ila balay.
Nagalab-ot sa P100, 000 ang kabug-usan nga kantidad sang ginkawat sang mga suspek nga gilayon naman narekober sang mga otoridad sa ila nga follow-up operation sa isa ka balaligyaan sang spareparts sa Barangay Cagay nga ginbaligya lamang sang mga suspek sa balor nga P5, 000.
