ROXAS CITY – Madamo nga igo sang bala ang balay sang nagapakandidato nga punong barangay sa Barangay Bato Bato, Mambusao, Capiz matapos paaarakan sang luthang kag habuyan sang granada.
Sa exclusive interview sang Bombo Radyo Roxas kay Senior Inspector Rachel Garnica, hepe sang Mambusao PNP, ginpahayag sini nga nagapadayon ang imbestigasyon sang pulisya kun sin-o ang responsable sa pagpaarak ang luthang sa balay ni incumbent barangay kagawad Arnel Labao alyas Botsoy.
Nagapati si Garnica nga isa tobtob duha ang mga suspek sa insedente kag posible nga ginpalibutan ang balay bangud sa mga buho nga nakita nga tuga sang pagpaarak sang luthang.
Narekober man sang mga pulis indi malayo sa balay ni Labao ang nagalab-ot sa 40 ka empty shell sang M-16 armalite rifle kag granada.
Nahibaluan nga nagakatulog ang pamilya Labao sang magluntad ang insedente kagab-i, sa diin matapos mabatian ang mabaskog nga pagsigabong gilayon ini nga naglumpat sa katre kaupod ang asawa kag nagkamaang sa kuwarto sang anak para siguraduhon nga wala ini napilasan.
