Nagtaas ang year-on-year sales sang automotive vehicles sadtong September 2024 sang 2.4 percent sa 39,542 units nagikan sa 38,628 units sa kaparehas nga bulan sadtong 2023, suno sa Chamber of Automotive Manufacturers of the Philippines, Inc. (CAMPI) kagTruck Manufacturers Association (TMA).
Ang passenger car sales ang rason sa pagtaas sadtong tinalikdan nga bulan kung sa diin nakabaligya sang 10,438 units, mas mataas sang 9.2 percent kung ikumparar sa 9,558 units nga nabaligya sadtong Setyembre sang tinalikdan nga tuig.
Suno sa report, ang commercial vehicle sales ang may flat growth nga 0.1 percent sa 29,104 units nagikan sa 29,070 units sa kaparehas nga panahon sadtong 2023.
Ang month-on-month sales sadtong 2023 nagtaas sang 1 percent nagikan sa 39,155 units nga nabaligya naman sadtong Agosto.
Mahibaluan nga wala sang bag-o nga model nga ginpaguha sadtong nakaligad nga bulan bangud target sang kadam-an sa vehicle companies nga ilunsyar ini sa 9th Philippine International Motor Show sa Oktobre 24 kag 27.
Samtang, ang total industry sales sumugod Enero tubtob Setyembre subong nga tuig, nagtaas sang 9.4 percent sa 344,307 units nagikan sa 314,843 units sa kaparehas man nga panahon sadtong tinalikdan nga tuig.
Ang passenger cars ang nagapabilin nga main driver sang pagtaas, kung sa diin ang sales nagtaas sang 13.4 percent sa 90,765 sa una nga siyam ka bulan sang tuig nga nagikan sa 80,009 units nga nabaligya sa kaparehas nga panahon sadtong 2023.
Pag-abot naman sa volume, ang commercial vehicle segment ang may pinakadako nga share, kung sa diin may benta nga 253,542 units sa una nga tatlo ka quarters, mas mataas sang 8 percent kung ikumparar sa 234,834 units nga nabaligya sadtong tinalikdan nga tuig.
Subong nga tuig, ang industriya ang may conservative target nga 468,300 units, apang ginsiling ni Gutierrez nga kumpiyansa ang industry players nga malab-ot ang 500,000 mark sa pagtakop sang 2024.
